Tunajenga Tanzania Mpya Isiyokuwa na Haki: Wapinzani Wateswa Serikali Yafumbia Macho

Katika kile kinachoonekana kuwa mwendelezo wa dhuluma dhidi ya demokrasia, polisi nchini Tanzania wamerudia tena mazoea yao ya kikatili dhidi ya raia — hasa wanachama wa vyama vya upinzani. Juzi, tukio la kusikitisha lilishuhudiwa mahakamani ambapo wanachama wa Chama cha Demokrasia na Maendeleo (CHADEMA) walipigwa, kudhalilishwa, na kutawanywa kwa nguvu za kijeshi walipokusanyika kwa amani kufuatilia kesi ya aliyekuwa mgombea urais, Tundu Lissu.

Hili si tukio la kwanza, lakini linauma zaidi kwa sababu linatokea wakati ambapo sauti za viongozi wa kitaifa zinatofautiana kwa namna ya kutisha. Wakati Katibu Mkuu wa Chama tawala (CCM) mhe. Nchimbi ametoa kauli za kukemea ukatili dhidi ya wapinzani — hatua inayoweza kuonekana kama mwanga mdogo wa matumaini — Rais wa Jamhuri ya Muungano wa Tanzania, Samia Suluhu Hassan, kwa kauli na matendo yake, ameonekana kuunga mkono vitendo vya polisi. Badala ya kuagiza uchunguzi huru au kulaani ukatili huo, Rais Samia ametoa matamshi yanayowapa polisi uhalali wa kuendeleza unyanyasaji dhidi ya wapinzani wa kisiasa. Hili ni jambo la hatari kwa taifa letu.

Serikali ina wajibu usiotetereka wa kulinda haki za raia wote — si tu wale wanaokubaliana na chama tawala. Katiba ya Tanzania, sheria za nchi, na mikataba ya kimataifa ambayo Tanzania imeridhia, vinataka serikali iheshimu, ilinde, na iweke mazingira huru kwa wananchi wote kushiriki katika siasa na kutoa maoni yao bila hofu ya kupigwa, kutekwa, au kudhulumiwa.

Picha za wanachama wa CHADEMA wakiwa na majeraha, wakianguka chini kwa kipigo, ni doa kwa sura ya taifa letu. Ni fedheha kubwa kwa taifa lililojengwa juu ya misingi ya utu, mshikamano, na uhuru wa kujieleza. Ikiwa serikali inaona wapinzani kama adui badala ya washiriki wa demokrasia, basi njia tunayoelekea si nyingine bali ni ya machafuko, chuki, na kuvunjika kwa mshikamano wa kitaifa. Tusipoamka sasa, tutachelewa.

Tanzania haitajengwa kwa risasi wala virungu. Tanzania haitadumu kwa hofu wala ukandamizaji. Historia ya mataifa duniani imethibitisha kuwa ukandamizaji dhidi ya raia hauwezi kuzima kiu ya uhuru, bali huchochea hasira na uasi wa umma. Serikali inayowapiga wananchi wake ni serikali inayojifukia kaburi lake yenyewe.

Kwa viongozi wetu: Mgongano wa kauli zenu ni sumu. Wananchi wanahitaji sauti moja inayotetea haki, si sarakasi za kisiasa zinazofunika maovu. Hatupaswi kuwa taifa linalofumbia macho dhuluma kwa sababu tu waathirika si wa upande wetu wa kisiasa. Leo ni CHADEMA, kesho ni wananchi wengine wasio na sauti.

Kwa polisi: Mnalo jukumu la kulinda raia, si kuwadhuru. Kuwapiga wananchi wasio na silaha ni usaliti wa kiapo mlichokiapa mbele ya bendera ya taifa. Historia haitawasamehe.

Kwa wananchi: Msikubali hofu kuwatawala. Haki haibebwi kwa neema bali kwa kudaiwa kwa nguvu ya umoja, kwa amani lakini kwa msimamo usiotetereka.

Mwisho wa tahadhari hii ni huu:

Ikiwa Tanzania itaendelea kuwalinda waliovaa sare wanaowatesa raia kwa mabavu, basi siku si nyingi tutajikuta katika giza zito la machafuko na migawanyiko isiyorekebishika.

Mabadiliko ya kweli huanza kwa kusema ukweli kwa sauti kubwa — hata pale ambapo viongozi wa juu wanaamua kulifumbia macho jambo hili la aibu.

Rev. Godwin Chilewa